RC AWASIHI VIONGOZI KUSHIRIKI MAFUNZO YA UONGOZI KIKAMILIFU ILI KUWEZA KUTOKA NA MIKAKATI YA KUUINUA MKOA

Imewekwa : September 18th, 2023

• Mkuu wa Mkoa wa Kagera, Mhe. Fatma Mwassa amefungua mafunzo ya uongozi kwa Viongozi wa Mkoa wa Kagera yenye lengo la kufanya tathmini ya hali halisi ya Mkoa wa Kagera ili kuwa na mwelekeo wa pamoja utakaoleta mabadiliko ya kiuchumi na kijamii kwa Mkoa wa Kagera.
  
  Akifungua mafunzo hayo, ameeleza kuwa mafunzo hayo ni ya muhimu na kuwataka washiriki kushiriki kikamilifu ili baada ya mafunzo hayo kwa pamoja watoke na mikakati itakayowezesha kuwa na mwelekeo wa pamoja wa kuinua Mkoa wa Kagera.
  
  “Mafunzo haya ni muhimu sana, nawapigia viongozi tutumie muda huu kushiriki vyema ili yaweze kutujenga na kuwa bora katika uongozi”, ameeleza Mhe. Mwassa
  
  Kwa upande wake Mwenyekiti wa Chama cha Mapinduzi Mkoa Ndugu Nazir Karamagi ameeleza kuwa nchi nyingi duniani zinapambana kwa ajili ya kukuza uchumi hivyo ni vema kupitia mafunzo hayo ikawekwa mikakati ya pamoja ya kukuza uchumi wa Mkoa wa Kagera.
  
  Wataalam kutoka Taasisi ya Uongozi, watafundisha mada mbalimbali, ambapo washiriki wa mafunzo hayo ni viongozi wa Chama na Serikali ngazi ya Mkoa na Wilaya. Mafunzo hayo yanafanyika katika ukumbi wa hoteli ya ELCT Bukoba Manispaa, kuanzia leo tarehe 18.09.2023 hadi tarehe 22.09.2023.