Uchumi wa Mkoa wa Kagera kwa muda mrefu umekuwa ukitegemea sana mazao ya asili mazao ya biashara kama kahawa, chai, tumbaku, ndizi na sasa miwa. Mazao haya licha ya kuwa na changamoto nyingi za masoko na magonjwa na uwekezaji wake unahitaji gharama kubwa na bado bei ya mazao haya kwa mkulima ni ndogo kulingana na gharama za uzalishaji, Mkoa unaendelea kuhimiza wakulima kuzingatia kanuni za kilimo bora cha kisasa na cha kibiashara katika kuzalisha mazao haya ilikufikia uchumi wa kati na wa viwanda. Aidha, tunahimiza wananchi kuwa namtazamo wa kuzalisha mazao mengine ikiwemo VANILA ili kujiongezea kipato zaidi.
Tunaendelea kuwahamasisha wananchi hasa wakulima kulima kwa wingi zao la Vanilla na kujipatia kipato na mkoa kuwa kinara wa uzalishaji wa Vanila.
Zao hili la vanilla kwasasa linashirikisha wakulima wasiopungua 6,000 kwa Wilaya za Bukoba, Missenyi, Muleba Karagwe na Kyerwa. Aidha, inakisiwa kuwa kiasi cha vanilla kinachozalishwa Mkoani hapa kwasasa ni wastani wa tani 15 kwa mwaka, ukilinganisha na uzalishaji wa juu uliowahi kuripotiwa wa tani 105. Bei ya kilo moja ya vanilla kwa msimu uliyopita ilikuwa na wastani wa Tsh. 65,000/= katika Mkoa wa Kagera. Kwa mwaka jana 2017 inakadiriwa zaidi ya Tsh 800,000,000/= (million mia nane) ziliweza kulipwa kwa wakulima kutokana na mauzo ya maharage ya vanilla.
