Elimu ya Msingi

Sera ya Elimu ya Mafunzo na Ufundi inaelekeza kuwa kila shule iwe na darasa la elimu ya awali kwa wanafunzi wenye umri kati ya miaka 5 hadi 6. Mkoa wa Kagera una jumla ya madarasa ya shule za Awali 941 katika shule za msingi za Serikali na za binafsi. Kati ya hizo, shule 890 ni za Serikali na 51 ni za binafsi.

Uandikishaji wa Elimu ya Awali: Watoto waliondikishwa elimu ya awali kwa shule za Msingi za Serikali mwaka 2017 ni 99,025. Wavulana wakiwa 50,021 na wasichana ni 49,004, na kwa upande wa shule binafsi elimu ya awali jumla ya wanafunzi 1,956 walioandikishwa, ikiwa wavulana ni 852 na wasichana mi 1,104 

Uandikishwaji Elimu ya Msingi: Uandikishaji wa wanafunzi Darasa la Kwanza kwa mwaka 2017, jumla ya wanafunzi 105,095 waliandikishwa kuanza darasa la kwanza, ambapo wavulana ni 52,992 na wasichana ni 52,103.

Shule za Msingi: Mkoa wa Kagera, una jumla ya Shule za msingi 941, kati ya hizo shule za Serikali ni 890 na shule za binafsi ni 51. Idadi ya wanafunzi katika shule za msingi ni 592,788, ambapo miongoni mwao wavulana ni 295762 na wasichana ni 297056 Idadi ya wanafunzi katika shule za binafsi 15,693 kati ya hao wavulana ni 8,060 na wasichana ni 7,633. Aidha, Mkoa una jumla ya shule Maalum 40 zenye wanafunzi walemavu 372 kati ya hao walemavu wa akili ni 102, wasioona 42, albino 55, walemavu wa viungo 48 na Viziwi/mabubu 125.

Ufaulu wa Mitihani ya Darasa la Saba: Kwa ujumla Mkoa wa Kagera ni miongoni mwa Mikoa iliyofanya vizuri katika matokeo ya mtihani wa darasa la saba uliofanyika mwaka (2016), Mkoa ulishika nafasi ya 5 kati ya Mikoa 26 ya Tanzania Bara ikilinganishwa na nafasi ya 7 mwaka 2015 kati ya Mikoa 25 na nafasi ya 8 mwaka 2014 kati ya Mikoa 25. Katika mtihani huo, jumla ya wanafunzi 36,700 walifanya mtihani, ambapo wanafunzi 29,676 sawa na asilimia 80.86 wamefaulu mtihani huo.

Ufaulu wa Mtihani wa Darasa la Nne 2016, Mkoa wa Kagera ulifanya vizuri kwa kushika nafasi 1 kutoka nafasi ya 8 mwaka 2015. Jumla ya wanafunzi 48,907 walifanya mtihani na waliofaulu ni wanafunzi 48,334 sawa na Asilimia 98.83.

Idadi ya Walimu Shule za Msingi: Mkoa, una jumla ya walimu wa shule za msingi 9,673 kati ya mahitaji ya walimu 15,322 Hivyo, upungufu ni walimu 5,649. Jitihada za Serikali za kuajiri walimu zimepunguza kwa kiasi cha kuridhisha upungufu wa walimu kutoka  asilimia 58 mwaka 2010 hadi kufikia asilimia 81 mwaka 2016. Mwaka 2015/2016 Mkoa ulipangiwa walimu 2,446.

Uwepo wa Miundombinu na Samani Katika Shule za Msingi: Mkoa una jumla ya vyumba vya madarasa 6,357 kati ya 12,334 vinavyohitajika sawa na asilimia 51. Pia una jumla ya nyumba za walimu 1,647 kati ya nyumba 14,596 zinazohitajika sawa na asilimia 11.2. Aidha, Mkoa una madawati 193,224 kati ya madawani 200,439 yanayohitajika sawa asilimia 96.4