Meli ya New Victoria Yatia Nanga Katika Bandari ya Bukoba Wananchi Wajitokeza Kwa Wingi Kuipokea Meli Yao

Posted on: June 28th, 2020

Meli ya New Victoria Hapa Kazi Tu imetia nanga katika Bandari ya Bukoba  leo Juni 28, 2020 majira ya saa 10 jioni ikitokea mkoani Mwanza  ikifanya safari yake ya kwanza mra baada ya ukarabati kukamilika na kupokelewa na umati wa wananchi wa  Mkoa wa Kagera wakiongozwa na Mkuu wa Mkoa Brigedia Jenerali Marco E. Gaguti pamoja na viongozi mbalimbali wakiwemo viongozi wa dini.

Akiongea mara baada ya meli hiyo kuwasili Mkuu wa Mkoa Gaguti  alisema kuwa ni takribani miaka sita tangu MV Victoria isitishe safari zake kutoka Bukoba kwenda Mwanza ambapo safari ya mwisho ilikuwa tarehe 18 Desemba 2014 na wakati huo Meli hiyo ikitegemewa na  wananchi wa Kagera kwa usafiri na usafirishaji wa mizigo ambapo tani moja ya ndizi ilisafishwa  kwa shilingi 27,000/=ukilinganisha  sasa malori yanasafirisha tani moja ya ndizi kwa gharama ya shilingi 100,000/= hadi shilingi 120,000/=

Aidha, Mkuu wa Mkoa alisema kuwa Meli hiyo sasa imeufungua tena mkoa wa Kagera kiuchumi kwa njia ya maji kuelekea katika nchi za jirani za Uganda na Kenya. Pia alisema kuwa meli ya New Victoria Hapa Kazi Tu ni mkombozi wa wananchi wote wa Kagera Bodaboda, Mama lishe na wengineo sasa wamejipatia ajira rasmi.

Naye Katibu Mwenezi wa Chama Cha Mapinduzi Taifa Bw. Humphrey Polepole akiongea mara baada ya kuwasili ana meli hiyo alisema kuwa Meli ya New Victoria Hapa Kazi Tu ipo vizuri na wataaalam wamethibitisha kuwa hakuna hitirafu yoyote kwani  imefungwa mitambo mipya ambayo ina nguvu mara mbili ya ile ya awali iliyokuwemo jambo ambalo litapelekea meli hiyo kufanya safari zake kutoka mwanza kuja Bukoba kwa saa sita tu.

Meli ya New Victoria Hapa Kazi Tu ina uwezo wa kupakia tani 200 za mizigo na abiria 1200 aidha, imekarabatiwa kwa gharama ya shilingi bilioni 22.8 na Kampuni ya JV of Gas Entec Company Limited, Kang Nam  Corporetion wakishirikiana na SUMA JKT. Pia Meli hiyo imefungwa mfumo mpya wa kidigitali ambapo mfumo wote wa analojia uliondolewa.

Meli ya New Victoria Hapa Kazi Tu baada ya kutia nanga katika Bandari ya Bukoba itaendelea kufanyiwa majaribio mbalimbali ya kitaalam ikiwa ni pamoja na kwenda katika bandari ndogo ya Kemondo kabla ya kurejea Jijini Mwanza na kubeba mizigo ya wanachi bule zaidi ya tani 100.